踏入12月，上個禮拜香港總算凍返啲、有啲冬天feel，不過凍咗幾日又暖返。天氣轉得咁突然，阿史身邊唔少人都病咗，各位都要好好照顧自己。好多人都話香港無冬天，最凍都有成6、7℃（當然，大帽山、打鼓嶺呢啲極端例子除外），而且最多凍幾日就無咗。以香港嘅緯度嚟講，市區嘅氣溫又真係好難凍得去邊，但原嚟香港有記錄以嚟，都曾錄得0℃，而高地更出現過0℃以下。

無錯，唔係大帽山，唔係打鼓嶺，香港喺1893年，真係錄得市區最低0℃嘅氣溫，堪稱香港開埠以嚟最低記錄。第二低嘅紀錄就要追溯到1957年嘅2.4℃，之後嘅每年最低氣溫走勢就梗係越嚟越高喇。前天文台台長林超英响2008年就曾經預測，香港喺2020年至2029年有機會再無冬天，話咁快就嚟到2019年年尾，唔知會唔會被佢講中呢？

原圖取自中新社。